ads

Edhe pse Shën Valentini ka rreth një muaj që ka kaluar, dashuria është dhe mbetet përgjithmonë.
Dëshiroj të nis këtë aventure me një ëmbëlsirë vërtet speciale të cilën e kam quajtur Torta e të dashuruarëve.

Është një tortë vërtet e shijshme dhe jo shumë e vështire për tu përgatitur, është thjesht një pandispanjë e mbushur me krem gjalpi me çokollate. Mund ta përgatitni për çdo rast të veçantë.

Përbërësit për Torta e të Dashuruarëve

• 75 gr miell


• 75 gr niseshte patateje


• 5 vezë


• 150 gr sheqer


• pak kripë


• pak vanilje pluhur(sipas dëshirës)

Përbërësit për Kremin e çokollatës

• 50 gr ujë


• 6 të verdha vezësh


• 150 gr sheqer


• 100 gr çokollatë të zezë


• 175 gr gjalpë(në temperaturë ambienti)

Përbërësit për shurupin (për të lagur pandispanjën)

• 100 ml ujë


• 50 gr sheqer


• 50 ml rum(ose pije tjetër sipas dëshirës)

Përgatitja e pandispanjës

Në radhë të parë ndezim furrën 180°C, në mënyre që kur të fusim tavën, furra të jetë tashmë e ngrohtë.
Fillojmë me përgatitjen a pandispanjës.

Ndajmë të bardhat e vezëve nga të verdhat. I hedhim në dy enë të mëdha. Me anë të një rrahësi elektrik, rrahim të verdhat e vezëve me gjysmën e sheqerit derisa të arrijmë një masë të fryrë në ngjyrë te verdhë të hapur. Rrahim tani edhe të bardhat e vezëve me pak kripe ( mos harrojmë të lajmë mirë rrahëset përpara), pas disa minutash shtojmë edhe sheqerin e mbetur, vazhdojmë ti rrahim derisa të arrijmë një shkumë të bardhë e që të mos bjerë nga ena.

Bashkojmë të bardhat e vezëve me të verdhat duke pasur kujdes që ti trazojmë gjithmonë nga lart poshtë me ngadalë. Bashkojmë miellin me niseshte edhe pak vanilje (në qoftë se dëshironi) dhe i hedhim me anë të një site në enën ku kemi vezët. I bashkojmë me kujdes me anë të një luge druri derisa të kemi një përbërje homogjene.

Lyejmë me gjalpë e me pak miell një tavë të rrumbullaket me diametër 24 cm. Hedhim përgatitjen në tavë.
Fusim tavën në furrë 180°C për 35-40 minuta pa e hapur asnjëherë furrën në gjysmë orën e parë të pjekjes. Heqim tavën nga furra, e lëmë të ftohet e pastaj heqim pandispanjën nga tava.

Përgatitja e kremit të çokollatës

Ndërkohë që pandispanja piqet në furrë ne mund të përgatisim kremin.
Fillojmë duke vënë në një tenxhere sheqerin me ujë, i vëmë në zjarr të ulët duke i trazuar shpesh derisa sheqeri të shkrije komplet, në këtë moment nuk e trazojmë më, dhe (nqs kemi) masim me një termometër sheqeri temperaturën e shurupit, duhet të arrijë 121°C.

Ndërkohë me anë të një rrahësi elektrik, fillojmë të rrahim të verdhat e vezëve duke i shtuar shurupin e sheqerit, vazhdojmë ti rrahim fort derisa të shohim që sheqeri është ftohur. Në një enë tjetër hedhim gjalpin në temperaturë ambienti dhe e shtypim me lugë derisa ta bëjmë kremoze. Shtojmë gjalpin e zbutur tek ena me vezët e rrahura. Vazhdojmë ti rrahim fort deri sa të formohet një shkumë. çokollatën e bëjmë në copa të vogla dhe e shkrijmë në banjomaria. Pasi ajo është ftohur e shtojmë te kremi i gjalpit. Vazhdojmë akoma ti rrahim fort derisa të shohim që të çokollata është bashkuar mirë me të gjithë përbërësit e tjerë dhe masa e përgatitur të jetë e fryrë. Kremin e përgatitur e vendosim në frigorifer.

Përgatitja e shurupit

Në një tenxhere shkrijmë sheqerin me ujë dhe rumin ose ndonjë pije tjetër sipas dëshirës. E lëmë të ftohet sherupin.

Përgatitja e tortës

Marrim pandispanjën që tashmë është ftohur dhe e presim në mes horizontalisht. E lagim pjesën poshtë (lagim pak edhe pjesën e siperme) me sherupin e pergatitur. Lyejme pjesën e poshtme me kremin e pergatitur, i vemë pjesën e sipërme dhe e zbukurojme tortën sipas deshirës me kremin. E fusim kremin në një shiringe ose xhep (nga ato që përdoren në pasticeri) dhe e zbukurojmë sipër. Nqs nuk e keni këtë mjet mund të përdorni edhe një qese të vogel dhe ti bëni një vrime të vogël e filloni ta zbukuroni tortën.

Ju bëftë mirë!

Foto nga Torta e të Dashuruarëve!

Nëse ju pëlqeu kjo recetë, shpërndajeni ne rrjetet sociale, gjithashtu mos harroni të na ndiqni në Facebook dhe Twitter!

ads