Biskota me bajame (ose siç i quajnë në Itali ‘cantuccini’) janë tipike të zonës së Prato në Toscana. Këto biskota janë shumë të shijshme dhe të veçanta, për vetë faktin se duhet të piqen dy herë në furrë.
Zakonisht, siç e kërkon tradita këto biskota hahen duke i ngjyer në verë, ( ‘Vin Santo’ quhet, e cila është një verë e ëmbël si liker), e cila i zbut dhe i jep një shije shumë të veçantë. Me pak përbërës dhe në pak kohë do të gatuajmë këto biskota që do të pëlqehen nga të gjitha.

Përbërësit për Biskota me bajame – Cantuccini

• 500 gr miell


• 300 gr sheqer


• 100 gr gjalpë


• 3 vezë


• 2 të verdha veze


• 250 gr bajame


• pak kripë


• 1 majë luge kafeje me sodë buke


• 1 vezë për lyerje sipër

Përgatitja

Në një enë të madhe hedhim miellin, sodën e bukës dhe sheqerin. I përziejmë bashkë e më pas shtojmë përbërësit e tjerë me radhë, vezët dhe të verdhat, pak kripë, gjalpin e shkrirë dhe bajamet. Fillojmë ti përziejmë shpejt dhe të punojmë brumin. Duhet të arrijmë një masë homogjene.

Ndajmë brumin në dy ose tre pjesë dhe me to bëjmë disa cilindra me trashësi rreth 5 cm të gjatë 30 cm. I vendosim në një tavë me letër furri poshtë. I lyejmë me penel me vezën e rrahur.
I pjekim në furrë të nxehtë 190°C përreth 20 minuta.

Më pas i lemë të ftohen pak dhe i presim në copa, pjerrtas, rreth 1 cm. Biskotat i vendosim përsëri në tavë dhe i pjekim në furrë të nxehtë 170°C përreth 10-15 minuta, derisa të thahen. Më pas nxjerrim biskotat nga furri dhe i lemë të ftohen.

Shërbejmë biskotat me Vin Santo. Biskotat mund ti ruajmë në vazo qelqi të mbyllura mirë.

Ju bëftë mirë nga ArtiGatimit!