Këtë recetë për kek e ka dërguar një admiruese faqes ArtiGatimit dhe që e falënderojmë pa masë. Nisur nga titulli, kek i thjeshte, mund të përgatitet në një kohë të shkurtër dhe rezultati është mahnitës. Ja se çfarë na duhen.
Përbërësit për Kek i thjeshtë
- 8 vezë
- 150 ml kos të bardhë
- 150 gr sheqer
- 300 gr miell
- pak sodë buke
- 1 lugë gjelle kakao pluhur
- 2 lugë gjelle gjalpë
- pak lëkurë limoni
Përgatitja
Në një enë qelqi, thyejmë vezët dhe i rrahim fort. Më pas shtojmë kosin dhe i trazojmë së bashku.
Më pas shtojmë edhe sheqerin dhe i përziejmë mirë. Shtojmë gjithashtu dhe pak lëkurë limoni të grirë. E përziejmë me kujdes.
Më pas shtojmë miellin, kakaon dhe rreth 1 lugë kafeje sodë buke. I trazojmë fort pa ndaluar derisa të gjithë përbërësit të jenë bashkuar mirë. Duhet të arrijmë një masë homogjene.
Lyejmë tavën me gjalpin e shkrirë dhe hedhim në të masën e përgatitur. Pjekim ëmbëlsirën në furrë të nxehtë 180°C përreth 20 minuta.
Më pas heqim nga furra dhe e leme të ftohet.
Presim ëmbëlsirën në copa dhe e shërbejmë!