Receta me Oriz
Shkruaj një koment

Rizoto me lakër dhe djathë gorgonzola

Përgatitja: 20 min - Pjekja: 15 min - Sasia: 4

Rizoto me djathë gorgonzola e lakër të bardhë dhe me një pluhur kanelle sipër është një pjatë e parë shumë e shijshme dhe e veçantë. Shija e fortë e djathit gorgonzola bashkohet me atë të kanellës dhe të lakrës së bardhë dhe na jep këtë pjatë fantastike. Duhet ta provoni patjetër këtë rizoto dhe jam e sigurt që edhe miqtë tuaj do ta pëlqejnë.



Përbërësit për Rizoto me lakër dhe djathë gorgonzola


  • 200 gr oriz

  • 1/2 kokë lakër

  • 1 qepë

  • 70 gr djathë gorgonzola

  • 3 lugë gjelle vaj ulliri

  • 80 ml verë e bardhë

  • pak kanellë pluhur + 1 degëz kanelle

  • brodo vegjetale ose ujë i ngrohtë

  • pak kripë


Përgatitja

Në një tenxhere hedhim vaj ulliri dhe grijmë hollë qepën. E kavërdisim ngadalë në zjarr të ulët. Shtojmë më pas orizin dhe i kavërdisim bashkë. Më pas i shuajmë me verën e bardhë. Ngremë zjarrin dhe lemë të avullojë alkoli.

receta-gatimi-risoto-artigatimit

Pastaj shtojmë lakrën e prerë shumë hollë me thikë dhe degëzën e kanellës. I përziejmë mirë dhe shtojmë rreth 400 ml brodo vegjetale të nxehtë. Lemë të ziejë ngadalë orizi. Nëse shohim që orizi ka nevojë akoma të ziejë, mund të shtojmë akoma brodo ose ujë të nxehtë.
Kur orizi është gati, (duhet patur kujdes që mos të jetë shumë i zier, por ‘al dente’) e heqim nga zjarri, heqim degëzën e kanellës dhe shtojmë djathin gorgonzola të prerë në copa. (Nëse ju pëlqen aroma e fortë e kanellës mund ti shtoni edhe pak kanellë pluhur.)

Trazojmë me kujdes rizoton në mënyrë që gorgonzola të shkrijë. E lemë të pushojë disa minuta e më pas e hedhim në pjata.

E servirim rizoton të ngrohtë me një pluhur kanelle sipër.

Ju bëftë mirë!

receta-risotto-rizoto-gatime-te-huaja-trendy-party-arti-receta

Shkruani komentin tuaj - Komente