Orizi me domate është një pjatë e shijshme dhe e shpejtë që pëlqehet si nga fëmijët dhe të rriturit. Kjo është një pjatë e thjeshtë edhe për ata që janë në hapat e para në kuzhinë.

Përbërësit për Oriz me domate

Përbërësit për 4-5 persona

• 400 gr oriz


• 1 qepë


• 400 gr domate të freskëta (ose domate salcë)


• 4 lugë gjelle vaj ulliri


• disa gjethe borziloku të freskëta


• 20 gr gjalpë


• 50 gr djathë parmixhan të grirë


• pak nenexhik(fakoltativ)

Përgatitja

Në një tenxhere hedhim vaj ulliri dhe grijmë hollë qepën. E lemë të kavërdiset pak e më pas shtojmë orizin. E trazojmë mirë dhe e lemë nja dy minuta të kavërdiset me qepën. Më pas shtojmë edhe domatet e freskëta të prera në copa ose domatet konservë. I trazojmë mirë dhe e lemë për disa minuta. Më pas shtojmë edhe rreth 800 ml ujë të ngrohtë. Hedhim edhe kripë. E trazojmë mirë dhe mbulojmë tenxheren me kapak dhe e lemë të ziejë me zjarr të ngadaltë. Nëse e shohim që orizi nuk është zier akoma, mund të shtojmë ujë. Kur uji është tharë komplet dhe orizi është gati i hedhim borzilokun e grirë hollë dhe sipas dëshirës pak nenexhik.

Fikim zjarrin dhe shtojmë në tenxhere gjalpin. E trazojmë mirë dhe në fund shtojmë djathin e grirë.E trazojmë përsëri mirë e më pas e hedhim në pjata. Servirim orizin me domate me djathë të grirë sipër dhe ndonjë gjethe borziloku.

Ju bëftë mirë!