Orizi me asparag është një pjatë e parë e shijshme dhe delikate. Asparag ose shparg siç është përkthimi në shqip është një perime shumë e pasur me vitamina e vlera ushqyese.Rizoto i gatuar me asparag dhe i përzier në fund me djathë parmixhan është me të vërtetë një pjatë e mirë dhe e shëndetshme.
Oriz me asparag (shparg)
Sasia: 0
Përbërësit
- 300 gr oriz
- 250 gr asparag shparg
- 50 gr gjalpë
- 2 lugë gjelle vaj ulliri
- 150 ml verë të bardhë
- 100 gr djathë parmixhan i grirë
- 1 qepë
- pak kripë
- pak piper i bardhë
Përgatitja
- Si fillim marrim asparagët dhe i pastrojmë. I lajmë me ujë të ftohtë dhe i vendosim të ziejnë në tenxhere me avull ose tenxhere me ujë. Pasi janë zier, i presim me kujdes duke lënë veç majat e asparagut.
- Në një tenxhere hedhim vajin dhe 20 gr gjalpë. Shtojmë qepën e grirë hollë. E trazojmë mirë dhe e lemë të zbutet me zjarr të ngadaltë përreth 15 minuta. Më pas shtojmë dhe orizin, e kavërdisim pak. E shuajmë me verë dhe lemë derisa të avullojë alkooli. Pastaj shtojmë ujë të ngrohtë ose ujin që kemi zier më parë asparagët.
- Shtojmë ujë pak nga pak derisa të ziejë orizi. Hedhim pak kripë e pak piper të bardhë të bluar. E trazojmë mirë. Kur orizi është gjysmë i zier, shtojmë edhe asparagët e prerë duke lënë veç majat e tyre. I përziejmë mirë me orizin dhe i lemë të përfundojnë zierjen.
- Fikim zjarrin dhe shtojmë në tenxhere te orizi gjalpin e mbetur dhe djathin e grirë.
- E trazojmë mirë derisa të shkrihet gjalpi. Më pas e hedhim në pjata duke i vënë sipër majat e asparagut. Mund ti hedhim pak piper të bardhë e djathë sipas dëshirës.
- Pjata është gati për tu servirur.
Notes
Përgatitja
Ju bëftë mirë nga ArtiGatimit!
