Kabunija është një ëmbëlsirë shumë e shijshme, e gatuar me oriz, sheqer dhe e përzier me rrush të thatë i cili i jep një shije të veçantë. Me pak përbërës dhe në pak kohë, do të kemi një ëmbëlsirë që do të kënaqë të gjithë të ftuarit tanë.
Receta për Kabuni
Sasia: 0
Përbërësit
- 500 gr oriz
- 1 litër lëng mishi mundësisht dashi(ose ujë)
- 200 gr sheqer
- 150 gr rrush të thatë
- 100 gr gjalp
- 1 lugë vaj ulliri
- pak kanellë pluhur
- pak karafil
- pak kripë
Përgatitja
- Në tenxhere hedhim gjalpin dhe vajin dhe pasi ka shkrirë gjalpi hedhim orizin. E kavërdisim për gati 5 minuta duke e përzjerë me lugë druri pa ndaluar. Hedhim ujin i cili duhet të jetë i nxehtë, dy – tre kokrra karafil dhe pak kripë.
- Për ti dhënë kabunisë atë ngjyrën e bukur, bëjmë karamelin duke skuqur 2 lugë sheqer me pak vaj ulliri. Pasi është skuqur sheqeri, e shtojmë te kabunija gjatë zierjes.
- E lemë masën të ziejë të mbuluar me kapak në zjarr të ngadalshëm.
- Pasi shikojmë që uji ka shterur dhe orizi ka çuar bulëza sipër e fikim zjarrin. E lemë të mbuluar për gati 10 minuta që orizi të zbutet.
- Pastaj e derdhim orizin në tepsi ku hedhim edhe rrushin e thatë.
- E lemë përsëri 10 minuta dhe më pas i hedhim sheqerin. E përziejmë sa të shikojmë që sheqeri është tretur dhe pastaj e hedhim në pjata, sipër hedhim kanellën dhe mund t’a zbukurojmë me reçel rrushi sipër.
Notes
Përgatitja e Kabunisë
Ju bëftë mirë!
