Sheqerparet janë ëmbëlsira shumë të shijshme me origjine turke dhe të njohura edhe në vendin tonë. Para shumë kohësh në Turqi i shijova këto ëmbëlsira dhe të them të drejtën shija e tyre më ka mbetur edhe sot. Kam provuar disa herë ti gatuaj por kjo recetë është ajo e cila u afrohet atyre që kam provuar në Turqi. Në fakt sheqerparet nuk janë të vështira për tu gatuar, duhet të kemi kujdes që të punojmë shpejt brumin pasi gjalpi në të shkrin e kjo gjë s’na ndihmon në krijimin e sferave për të krijuar këto ëmbëlsira.

Përbërësit për Sheqerpare

Për brumin rreth 30 cope

• 220 gr miell


• 100 gr gjalpë


• 100 sheqer


• 1 vezë


• 2 lugë gjelle kos i bardhe


• 1 lugë çaji maja për ëmbëlsira


• pak kripë


• disa bajame ose fistik

Për sherbetin

• 200 gr sheqer


• 200 ml ujë


• 1/2 lugë lëng limoni


• pak vanilje pluhur (sipas dëshirës)

Video Receta Sheqerpare

Përgatitja e sherbetit

Këshilla ime është që sherbetin ta përgatisni më përpara se të filloni përgatitjen për sheqerparet pasi duhet të hidhet i ftohtë.
Hedhim ujin dhe sheqerin në një enë dhe i vendosim në zjarr. Në momentin që fillon të ziejë hedhim pak lëng limoni dhe e lemë akoma për 2-3 minuta në zjarr të ulët. E lëmë të ftohet.

Përgatitja për sheqerparet

Fillojmë me përbërësit për brumin. Në një enë qelqi ose porcelani hedhim miellin e bashkuar me majanë, sheqerin, vezën, kosin dhe fillojmë ti përziejmë. Me pas shtojmë gjalpin e shkrirë por jo të nxehtë dhe pak kripë. Fillojmë i trazojmë përsëri me dorë derisa të krijojmë masë homogjene.

Marrim një tavë ku kemi shtruar letër kuzhine apo të lyer me pak gjalpë. Fillojmë dhe krijojmë sfera të vogla nga brumi që krijuam dhe i vendosim në tavë. Duhet të kemi kujdes që ti vendosim larg njëra tjetrës pasi do të fryhen dhe kështu evitojmë që të bashkohen.
Pasi të kemi mbushur tavën, shtypim pak sferat sipër me bishtin e një luge druri dhe i japim formën karakteristike te sheqerpareve.

I fusim në furrin e nxehtë më parë në temperaturën 180°C. Duhet ti pjekim sa të marrin ngjyrë ari. Do të duhen rreth 20-30 minuta.

Pasi sheqerparet të jenë pjekur, i nxjerrim nga furra dhe të nxehta i fusim në sherbetin e ftohtë. I vendosim në një pjatë dhe sipër shtojmë nga një bajame ose fistik dhe i shërbejmë.

Ju bëftë mirë nga Artigatimit.com