Kjo tortë në formë zemre është ideale për të festuar festën e Shën Valenitinit dhe jo vetëm. Kjo është një tortë që mund ta gatuani në çdo moment që keni dëshirë për një ëmbëlsirë të veçantë. Shija e çokollatës kombinon shumë me specin djegës. Provojeni dhe do të jem e sigurt që do të jetë një nga tortat që do të përgatisni shpesh.

Përbërësit për Tortë me çokollatë e spec djegës

• 200 gr miell


• 100 gr sheqer


• 25 gr kakao pluhur


• 100 ml qumësht


• 200 gr çokollatë të zezë


• 100 gr gjalpë


• 4 vezë


• 1/2 pako maja për ëmbëlsira


• pak kripë


• 1 lugë gjelle brandy


• 1 spec djegës

Përgatitja e Tortës me çokollatë

Si fillim hedhim qumështin me specin djegës në një tenxhere dhe e lemë të nxehet. Sa të fillojë zierja e heqim nga zjarri dhe e lemë në infuzion përreth 20 minuta.
Më pas filtrojmë qumështin. Në një tenxhere hedhim gjalpin ,çokollatën dhe qumështin e filtruar dhe i vendosim në zjarr të ngadaltë që të shkrijnë gjalpi e çokollata. I trazojmë mirë se bashku, e më pas shtojmë pak kripë , brandy dhe kakaon pluhur. I përziejmë mirë derisa të bëhet një masë homogjene.
Në një enë qelqi hedhim vezët me sheqerin dhe fillojmë ti rrahim me rrahësin elektrik derisa të arrijmë një masë të fryrë.

Më pas shtojmë pak nga pak miellin dhe majanë dhe vazhdojmë ti rrahim me rrahësin elektrik.
Shtojmë më pas masën me çokollatë dhe i përziejmë së bashku.
Masën e hedhim në një tavë në formë zemre ,të lyer paraprakisht me pak gjalpë e miell që të mos ngjisë, (ose nëse nuk keni mund ta hidhni dhe në një tavë të rrumbullakët me diametër 22 cm). 
Pjekim tortën në furrë të nxehtë 180°C përreth 30 minuta. Pjesa e brendshme e tortës duhet të rrijë e butë dhe nuk ka nevojë për mbushje me vonë.

Heqim tortën nga furra dhe e lemë të ftohet.
Më pas vendosim tortën me çokollate në pjatancë dhe e shërbejmë në feta të shoqëruar me pak pana të rrahur ose me çokollatë të shkrirë sipër.

Ju bëftë mirë!