Supë me kërpudha është një recetë e lehtë dhe me vlera ushqimore që duhet të shtojmë në dietën tonë. Ekzistojnë më shumë se 4000 lloje kërpudhash, por vetëm 100 prej tyre janë të ngrënshme.
Supë me kërpudha
Sasia: 4 persona
Kalori: 140kcal
Përbërësit
- 350 g kërpudha të freskëta
- 80 g gjalpë
- gjysmë kokërr qepë e kuqe
- 2 thelpinj hudhër
- 20 ml verë e bardhë
- kripë
- piper
- pak trumzë e thatë
- 4 gota lëng pule ose supë perimesh
- gjysmë filxhan pana ajkë qumështi
- majdanoz
Përgatitja
- Si fillim pastrojmë dhe lajmë kërpudhat. Mund të përdorim çfarëdo lloj kërpudhe për këtë recetë. Nëse nuk kemi kërpudha të freskëta mund të përdorim kërpudhat të thata, të cilat duhen zbutur në ujë dhe më pas i gatuajmë.
- Marrim një enë dhe e vendosim në zjarr ku shtojmë gjysmën e gjalpit. Grijmë qepën hollë së bashku me hudhrën. Më pas hedhim kërpudhat, shtojmë gjalpin e mbetur, kripë, pak trumzë. Më pas hedhim verën dhe i gatuajmë për 10 minuta, derisa të avulloj alkooli.
- Shtojmë më pas lëngun e pulës. I lëmë 30 minuta të ziejnë dhe më pas i kalojmë në grirës me zhytje. Sipas dëshirës mund të heqim ndonjë kërpudhë për ta lënë të plotë.
- Hedhim pana dhe pak piper. I lëmë 5 minuta të tjera në zjarr.
- Supa me kërpudha është gati. E shërbejmë me disa kërpudha të plota dhe pak majdanoz sipër.
Kërpudhat përmbajnë vitaminë B3, e cila ndihmon në funksionimin e duhur të sistemit nervor dhe vitaminë B2, e nevojshme për prodhimin e qelizave të kuqe të gjakut për metabolizmin e yndyrave, proteinave dhe karbohidrateve. Kërpudhat janë të dobishme në luftimin e sëmundjeve kardiovaskulare dhe në frenimin e formimit të kolesterolit në arterie.
Lexoni gjithashtu Oriz me Kërpudha.
