Petulla greke – Loukoumades

Për të përgatitur këto petulla greke, fillojmë duke shkrirë majan se bashku me 1 lugë të vogël sheqer dhe pak ujë. I përziejmë mirë që të tretet majaja dhe e lëmë të pushojë për 10 minuta.

Pas 10 minutash shtojmë majanë e tretur tek ena me miell dhe e përziejmë mirë me dorë.

Shtojmë dhe 1 lugë të vogël me kripë. Hedhim ujë pjese pjese derisa të formohet një masë e njëtrajtshme.

E mbulojmë me një qeskë kuzhine dhe e lemë brumin të vijë për 40 minuta ose sa të dyfishojë masën.

Ndërkohë qe brumi pushon, përgatitim sherbetin.

Në një enë hedhim ujin dhe pasi ka marrë valë shtojmë sheqerin. Sherbetin e trazojmë derisa të tretet sheqeri. Shtojmë dhe disa fara karafili nëse dëshirojmë. E lemë të ziejë për gati 5 minuta. Në fund shtojmë pak lëng limoni dhe sherbeti është gati.

Pasi brumi ka ardhur, heqim qeskën e kuzhinës dhe jemi gati të përgatitim petullat. Në një enë ku kemi hedhur vaj të bollshëm e lemë në zjarr derisa të nxehet.

Marrim brumin me një dorë dhe me tjetrën presim toptha me ndihmën e një luge dhe i hedhim në vaj. Kështu vazhdojmë sa të mbushet ena.

Gjatë kohës që petullat skuqen mund të jetë e nevojshme ti kthejmë nga ana tjetër. Pasi ato marrin një ngjyrë të artë i heqim dhe i vendosim në enën me sherbetin e ftohur.

Petullat grekë janë gati, gjatë servirjes hedhim kanellë dhe i shërbejmë.