Receta me Mish
Komente nga Fb - 1 koment

Tavë me mish bibe dhe oriz në çerep

Përgatitja: 25 min - Pjekja: 45 min - Sasia: 6 Persona

Tave me mish bibe me oriz e pjekur në çerep ka një shije të veçantë për vetë faktin që piqet ngadalë nga prushi dhe merr një aromën të këndshme.
Duket pak e lodhshme kjo lloj pjekje, por rezultati final ia vlen mundimin e bërë. Si fillim duhet bërë një zjarr i madh me dru , vihet mbi të çerepi në mënyrë që të nxehet. Kur flakët e zjarrit të jenë ulur dhe në fund ka mbetur prushi, në këtë moment mund të filloni pjekjen. Edhe çerepi sipër mbushet me shpuzë.
Shija e gjellëve të gatuara me çerep është shumë e veçantë. Duhet patjetër ta provoni.

Përbërësit për Tavë me mish bibe dhe oriz në çerep


  • 3 kg mish bibe

  • 500 gr oriz

  • 1 qepë

  • 2 kokrra domate

  • 100 gr gjalpë

  • pak vaj ulliri

  • pak kripe, piper


Përgatitja

Si fillim marrim bibën dhe e presim në copa, e pastrojmë mirë, e lajmë dhe e vendosim në tavë. Sipër i hedhim copa gjalpi dhe sipër tavës vendosim çerepin ose saçin. E lemë përreth 20-25 minuta derisa të skuqet mishi.

Ndërkohë që skuqet mishi përgatisim salcën. Në një tigan hedhim vaj ulliri dhe grijmë hollë qepën. E vendosim tiganin mbi zjarr dhe e trazojmë shpesh herë. Kur qepa të ketë marrë ngjyrë të verdhë shtojmë domatet e grira.

Kur domatet të jenë shkrirë komplet shtojmë orizin, i trazojmë mirë. Shtojmë pak nga pak edhe ujë të ngrohtë ose lëng mishi, ( për 500 gr oriz duhen rreth 1l. ujë). Hedhim kripë e piper dhe orizin e përgatitur e hedhim në tepsinë me mish. E vendosim përsëri tavën të piqet në saç, duke pasur kujdes që të ketë prush të mjaftueshëm edhe poshtë tepsisë.

E lemë tavën të piqet ngadalë përreth 40-45 minuta. (Këtë tavë mund ta piqni edhe në furrën e sobës, por s’do të ketë të njëjtën shije me pjekjen me prush.)

Pas kësaj nxirreni tavën dhe shërbejeni pjatën të ngrohtë të shoqëruar me një gotë verë të kuqe.

Ju bëftë mirë nga ArtiGatimit

1 Comment

Shkruani komentin tuaj - Komente