Receta me Mish
Shkruaj një koment

Kordhëza në tavë

Përgatitja: 20 min - Pjekja: 40 min - Sasia: 4

Kordhëzat janë zorrët e bagëtive të imëta. Te gatuar në furrë, receta gatimi me një salcë domatesh dhe erëza janë një pjatë shumë e shijshme.
Vështirësia qëndron vetëm në pastrimin e tyre dhe lidhjen e tyre gërshet.

Përbërësit për Kordhëza në tavë


  • 1 kg zorrë

  • pak kripë

  • pak piper kokërr dhe pak të bluar

  • 3-4 gjethe dafine

  • 1 qepë

  • 2 domate (ose pak salcë domate)

  • pak majdanoz

  • 1 lugë miell

  • pak vaj ulliri

  • 5-6 thelpinj hudhra


Përgatitja

Zorrët pasi pastrohen e lahen mirë me ujë të bollshëm, kthehen nga ana tjetër dhe lahen përsëri mirë.
Më pas zorrët e pastruara mirë bëhen në formë gërsheti. Fillojmë me ato më të trashat dhe mbi to pleksim ato më të hollat.
I lidhim mirë fillimin dhe fundin. Vendosim në një tenxhere të madhe zorrët e përgatitura në këtë mënyrë. I hedhim ujë dhe e lemë të ziejë përreth 20 minuta.

receta-gatimi-mish-qengji-tave-domate-perime-freksi

Më pas i nxjerrim me kujdes nga tenxherja dhe i vendosim në një tavë. Në një tigan hedhim 1 lugë miell dhe e skuqim për disa minuta duke e trazuar gjithmonë që të mos digjet. Kur ai të jetë bërë i verdhë i hedhim pak nga pak rreth 300 ml ujë në të dhe e trazojmë fort që të mos krijohen kokrriza. I lemë të ziejë pak derisa të trashet e më pas e hedhim mbi zorrët në tavë.

Më pas hedhim pak vaj ulliri në tigan dhe shtojmë qepën e grirë hollë. E kavërdisim pak dhe shtojmë domatet e grira ose salcën. Shtojmë gjithashtu edhe hudhrat e grira. I trazojmë mirë dhe i shtojmë edhe këto mbi tavë. I trazojmë mirë që të bashkohen mirë përbërsit duke pasur kujdes që të mos prishen zorrët.
I hedhim gjethet e dafinës, piperin kokërr dhe fusim tavën të piqet në furrë të nxehtë 200°C përreth 40 minuta.
Pasi e nxjerrim nga furra i hedhim majdanoz të grirë dhe piper të bluar sipër.
Shërbejmë tavën të ngrohtë të shoqëruar me bukë të thekur.

Ju bëftë mirë nga ArtiGatimit.com!

receta-gatimi-mish-qengji-tave-domate-perime

Shkruani komentin tuaj - Komente