Kuzhina shqiptare ka evoluar brez pas brezi duke u pasuruar dhe përmirësuar, mirëpo përsa u përket recetave tradicionale sikur kemi pak nostalgji. E tillë është edhe kjo tavë që do të paraqesim në këtë recetë. Një këshillë për amvisat e reja që duhet t’i gatuajnë e të mos i harrojnë recetat tradicionale.
Tavë me plëndës – Kuzhina shqiptare
Sasia: 2 persona
Kalori: 190kcal
Përbërësit
- 2 kg plëndës
- 2 kokrra qepë
- 2 lugë uthull
- pak spec të kuq
- 2 lugë gjelle miell
- vaj ulliri
- kripë
- mëndrëz
Përgatitja
- Plëndësi duhet të jetë i freskët. E pastrojmë, e lajmë me ujë të bollshëm dhe e lemë 10 minuta në ujë me gëlqere. Pas dhjetë minutash e fërkojmë mirë me ujin e gëlqeres pastaj e shpëlajmë me ujë të ngrohtë.
- Shikojmë që plëndësi është bërë i bardhë dhe e ziejmë ashtu të pa prerë. Pasi ka zier, e presim në thela duke i radhitur në një tavë.
- Në një tigan kaurdisim qepën e grirë hollë derisa të skuqet mirë.
- Hedhim miellin të cilin e kaurdisim pak, e shuajmë me uthull dhe i shtojmë lëngun e plëndësave duke e trazuar shpejtë e shpejt.
- Hedhim specin, mëndrëzën, e rregullojmë me kripë. Masën e hedhim në tavën me plëndësat.
- E pjekim në furrë të nxehur më parë në temperaturën 200 gradë, për 20 minuta.
Receta gatimi të tilla te kuzhinës shqiptare mundohen ti rezistojnë kohës, na dërgoni gatimet tuaja në hapësirën e komenteve ose në faqen tonë në Facebook.
