Antipasta (Meze)
Shkruaj një koment

Lakror me qepë të njoma

Përgatitja: 25 min - Pjekja: 20 min - Sasia: 4 Persona

Lakror me qepë është një pjatë e thjeshtë por me shume vlera ushqimore dhe e shijshme. Mund të shërbehet si antipastë ose pasditeve mes miqsh.

Përbërësit për Lakror me qepë të njoma


  • 850 gr qepë të njoma

  • 200 gr miell misri

  • 50 gr djathë i bardhë

  • 1 kokërr vezë

  • 100 ml vaj ulliri

  • mëndrëz

  • kopër

  • kripë

  • piper


Përgatija e lakrorit

Për të përgatitur lakror me qepe, si fillim zgjedhim qepet e freskëta dhe të njoma. I pastrojmë mirë në ujë të rrjedhshëm dhe i presim në rrathë të vegjël bishtat edhe gjethet.

Në një enë hedhim vajin e ullirit sa më cilësor dhe sapo është nxehur shtojmë qepët. I kaurdisim në zjarr të ngadalshëm pak sa të zbuten. E heqim enën nga zjarri i shtojmë djathin erëzat të prera hollë, vezë e rrahur dhe piper. Nëse dëshironi mund te shtoni copa te vogla proshute të pjekur, gjithsesi nëse keni miq vegjetarian mund ta shërbeni edhe pa proshutë.

Në një enë hedhim miellin, ujë të vakët sa të bëhet një brumë i derdhur dhe shtojmë vaj ulliri dhe kripë.
Brumi hidhet në tavën e pjekjes të lyer me vaj. Me masat e dhëna nevojitet një tavë me diametër 40cm.
Sipër brumit hedhim qepët duke i hapur në të gjithë sipërfaqen e tavës. Sipër qepëve sitim pak miell të cilin e spërkatim me pak ujë ose nëse dëshironi edhe qumësht. Tavën me lakror me qepe e pjekim në furrë të para ngrohur në temperaturën 200°C për 20 minuta.

Lakror me qepe është gati. E shërbejmë të ngrohtë me djathë të bardhë ose edhe me kos.

Receta të tjera që mund t’ju interesojnë lakror me hithra ose lakror me lakra, pispili.

Ju bëftë mirë nga Arti Gatimit!

Shkruani komentin tuaj - Komente