Roletë me kanellë janë ëmbëlsira shumë të mira për mëngjes apo pasdite të shoqëruar me një kafe a qumësht. Këto ëmbëlsira janë shumë të njohura në Evropën e Veriut dhe Amerikë dhe thuhet që origjinën e kanë nga Suedia. Siç e thotë dhe vetë emri këto ëmbëlsira janë të përgatitura me një bazë brumi ku mbizotëron aroma e shija e kanellës. Këto ëmbëlsira në formë role ( të njohura me emrin ‘cinnamom rolls’ nga anglishtja) janë shumë të shijshme për të filluar mbarë ditën.

Përbërësit për Role me kanellë – Cinnamon Rolls

Përbërësit për brumin:

• 200 gr miell 00


• 200 gr miell manitoba(miell i fortë)


• 150 ml qumësht


• 50 gr gjalpë


• 50 gr sheqer


• 10 gr maja birre


• 1 vezë +1 të verdhë veze


• 5 gr kripë

Përbërësit për mbushjen:

• 5 luge gjelle sheqer panxhari


• 3 luge gjelle kanelle


• 30 gr gjalpë i shkrire

Për sipër duhen:

• 3 lugë gjelle sheqer pluhur


• pak ujë

Përgatitja

Si fillim shkrijmë majanë në qumësht, e me pas bashkojmë gjysmën e miellit dhe e përziejmë. (Nëse keni një robot ose planetaria mund ta përgatisni aty direkt dhe përbërësit i shtoni sipas radhës). Me pas hedhim një të verdhë veze dhe gjysmën e sheqerit. I përziejmë përsëri. Shtojmë vezën tjetër dhe pjesën e ngelur te sheqerit, kripën dhe gjalpin e zbutur. Vazhdojmë ta përziejmë mirë dhe në fund shtojmë ngadalë edhe pjesën tjetër te miellit. Bëjmë mirë brumin derisa të arrijmë një masë homogjene.

Masën e formuar e leme te pushoje në një enë qelqi te mbuluar me qeskë kuzhine derisa te dyfishohet.
Më pas marrim brumin dhe e hapim ne formën e një drejtkëndëshi me trashësi nga 5mm ne 8 mm.Me anë të një furçe shtrojmë sipër petës gjalpin e shkrirë.
Me pas bashkojmë në një enë sheqerin e trashë me kanellën dhe e përhapim sipër petës.

Në këtë mënyrë na ngelet veç ta mbledhim role petën e përgatitur duke bere kujdes që te mos dalë mbushja.

Me pas presim roletë me kujdes në feta te holla dhe i sistemojmë në një tave me letër furre. Mbulojmë tepsinë me një qese kuzhine dhe i leme që brumi të fryhet. Duhet rreth një orë.

Pas kësaj marrim tavën dhe e fusim në furrë të nxehtë 180°C përreth 20-25 minuta.

Nxjerrim ëmbëlsirat nga furra, i lemë të ftohen pak e më pas i shërbejmë duke i hedhur sipër pak sheqer pluhur të përzier me ujë në formë kremi.

Ju bëftë mirë!

Shënim: Miell manitoba është një lloj mielli me fortësi të lartë. Ideal për brumëra që duan kohë fryrje të gjatë. Tek paketimi duhet të shikoni koeficientin W i cili duhet të jetë mbi 350.

Recipe in English