Tortë me djathë krem dhe boronica – Cheesecake

Për të përgatitur këtë tortë me djathë krem dhe boronica si fillim duhet të përgatitim bazën me biskota. Për të vepruar shpejtë mjafton të hedhim në një grirës elektrik biskotat dhe ti grijmë për pak çaste. Në rast të kundërt nëse nuk kemi grirës elektrik i vendosim në një qeskë dhe i copëtojmë avash avash.

Gjalpin e shkrijmë dhe e bashkojmë më mjaltin. Më pas e bashkojmë tek biskotat e grira dhe e përziejmë mirë. Nëse preferojmë shtojmë pak kanellë.

Biskotat i vendosim në një tave me diametër 18/22cm dhe i hapim mirë në të gjithë sipërfaqen. Sigurohemi qe tava të jetë e lartë. Vendosim bazën për cheesecake ne frigorifer për të paktën 30 minuta.

Për të përgatitur mbushjen, hedhim në një enë djathin krem së bashku me gjizën pa kripë (rikota) dhe i përziejmë mirë. Shtojmë më pas sheqerin dhe i përziejmë.

Në hapin tjetër shtojmë vezët një e nga një. Duhet të jete trazuar mirë veza e parë pasi të shtojmë tjetrën. Në fund shtojmë kosin e bardhë të përzier me pak lëng limoni.

Niseshten e trazojmë pak me ujë dhe ja shtojmë masës për cheesecake. E trazojmë mirë të gjithë masën.

Marrim bazën e ftohur dhe sipër hedhim mbushjen me djathë që përgatitëm. E nivelojmë mirë.

Ndezim furrën në temperaturën 160 °C dhe pjekim cheesecake për 1 orë e 20 minuta. Ideale do të ishte pjekja e cheesecake ne banjëmaria. Duke e vendosur tavën në një enë më të madhe dhe poshtë mbushur me pak ujë të nxehtë.

Në një enë hedhim boronicat e lara së bashku me sheqerin pluhur. I lëmë në zjarr për të paktën 10 minuta sapo të marrin valë. Shtojmë pak nga lëngu i limonit. I vendosim të ftohen.

Pasi është pjekur torta me djathë krem dhe boronica, sipër i shtojmë përgatitjen me boronica. Cheesecake duhet te pushojë të paktën 2 orë përpara se ta konsumojmë.